الاسبوع اللّي فات كنت عند ريفوندار متاع التوب نات في دوز   Top Net  ،بالطبيعة عتدي مشكلة و كنت نحاول نحلّها معاه. ماعلينا في الموضوع هذا ممكن نرجعله في تدوينة لاحقة ،عاد بعد ما كمّلنا دوّتنا ،قالي ريت ها البيعة الجديدة متاع التوب نات ، راهو بروموسيون وبوبلاش ، قلته كيفاش ها البروموسيون ؟

طبّس تحت الكنتوار وجبدلي كردونة  قدّ ماهي وقالّي هاهو شوف بعينك ،نلقاها كرودنة مكتوب عليها Easy Net ،وحطّ صبعه على السّوم جاي مطبوع من التوب نات وقال شوف هاهو السّوم 199 دينار هاكهو ،وزاد حلّي هاك الكرودنة

- هاو آش فيها ياسيدي ،اكرون بّلى   Ecran Plat و سوري Souris وكلافيي  Clavier  وكاميرا 5 ميغا و الكركوبة هاذي

- اهه…كيفاش هذي

- هاذي تخدم كيف الاديناتور تزيدها ديسك دير disc dur  تولّي ارديناتور على حالو

-  تي هاهو بلاش هذا ، ويساعد برشة عباد ما تقدرش على ارديناتر .

- تعرف انا الاكرون وحدها عندي منها نبيع فيها ب 133 دينار والكاميرا هذيكة تعمل 38 دينار

- اممم ،

- شوف يا سيدي راهو عندك فيها كنتراتو بعام و512 كيلوبايت .ومعاهم فلاش ديسك 4 GB

- واللّه شيخات ،….وعندك منها برشة ها الكرادن ؟

- لا راهو بالكومند هاذي مولاها جايها بعد شويّ باش يهزّها راهو فلان الفلاني تعرفه ماهو ؟

- نعرفه ايه … هيّا ربّي يعينك .

وفي المغرب بعد ماكمّلنا الخدمة ،شفت هاك الجماعة وحكيتلهم على الخبر السّعيد ،اللّي عجبتهم ها البرومسيون ،وكيما تعرفوا ماهو الخبر مايتّقاش ،ليه ليه ماولاّت الجماعة تعدّي في الكومندات .

- اليوم في الصّباح وكيما العادة شفت جماعتنا في القهوة ،وبعد تبادل بعض الاحاديث والاخبار ،قالّي واحد من الجّماعة

- تعرف يا شهاب هاك الخبر متاع الانترنات راهو طلع غالط .

- كيفاش ؟

- ماهو الاولاد اللّي يخدموا معانا حبّوا يعملوا كومندات على الانترنت ، ياخي قاللهم راهو غالط  هاك ال 199 دينار، ومعاهم 30 دينار  على 36 شهر.

- ملاّ حالة ، معناها يمشي يشري ارديناتور كامل ومعاه الأنترنت وهو مرتاح موش خير بالله ؟؟؟

- هيّا باللّه نوصلوه يا فلان نفهموا ها الحكاية .

دخلنا للمحلّ متاع السيّد الريفوندار ،

- السّلام عليكم

- وعليكم السّلام

- تي كيفاش القصّة متاع ال Easy Net  يا فلان ؟

- راهم مافهّمونيش ،جماعة التوب نات ،أمس كلّموني وقالولي آش ثمّ عندكم جماعة دوزالمطالب هابطة كيف المطر ،لاباس ماهو ؟؟؟

ردّيت عليهم العباد مسترخصين البرومسيون ،وهابطين عليها هات هات  …ياخي ردّوا عليّ لا ياسي فلان راهو هذيكة ال 199 دينار المكتوبة على الكردونة هي الدفعة الاوّلة وبعد 30 دينار في 36 شهر .

- هههههههههههه تي هاهي ولّت حسبة يا فلان ،ملاّ توب نات .

وخرجنا نضحك من الخيبة والبلاهة.